Kibra spiral negativo..

CHATA tabata anfitrion di un eksitoso konferensha di invershon.

Jacob Gelt Dekker, komo keynote speaker, a tene un diskurso notabel, ku a tene 400 hende na punta di nan  stul. ( despues dos dia di skucha esforsa, “netwerken” y un lunch ku ta  maria hende y bastante binja) Pa, na un momento asina, bo tene e atenshon di tur e hendenan hopi inteligente y sabi ,bo por bisa trankil,ta un logro enorme.Si na final desenas di hende ta para aplaudi, kual sigun wespetnan di konferensha experensha ta apsolutamente inusual, e organisashon tin motibo pa ta orguyoso di su eskoho.Y e organisashon, CHA (Caribbean Hotel Association) y CTO (Caribbean Tourism Organization) tabata hopi orguyoso! Asina orguyoso ku pa motibo di e reakshonan di e grupo di hende internashonal nan a ekspresa e deseo pa organisa mas di e tipo di diskursonan.

Sin skonde nada, Jacob a pone dede riba problema ku tur hende den área di Caribe ta konfrontá. Ta ora disidí di papia abiertamente riba nos problemanan, lo por haña solushon. Esaki tabata konklushon di hopi representante na e konferensha. Representante di entre otro bankonan, kompanianan di seguro, prensa internashonal, accountant, gobièrnunan y kadenanan di hotèl di fama mundial a komprendé e mensahe di Jacob. Nan tambe tabata di opinion ku nos tur den Caribe mester ta alerta pa e peligernan ku ta menasa nos área i ku no mester warda pa tuma medida apropiá.  Ta úniko manera pa nos potensha pa yega na “booming business” por haña un chèns. Ta esei Dekker kier a bisa. Su intenshon tabata pa spièrta tur hende, kurashá i konsientisá. E kier a bisa ku e tambe a pasa den hopi turbulensia, pero tòg el a logra. Na final el a invitá tur hende pa sigui su ehèmpel: “Follow me in my wake” tabata su frase final.

Realidat ta ku fuera di tur esaki - manera ta su kustumber - Jacob a usa su diskurso pa shock hende. No ta solamente su manera di hasi, pero tambe ta un manera konosí den mundu di marketing internashonal pa lanta hende fo’i soño i tene nan alèrt. Durante e diskurso por a mira ekspreshon riba kara di e presentenan kambia di sorpresa i iritashon, pa aprobashon i atmirashon. Na final di e diskurso a sigui un diskushon animá i positivo.  Kaminda prensa internashonal a konsentrá riba su reakshon di wéspet importante, prensa lokal i eksplísito nos planta nashonal di televishon a reakshoná manera ta maribomba a pika nan. Nan a sigui tras di e paña kòrá ku nan mes a pone dilanti nan wowo: den mundu di marketing ta yama e fenómeno aki “tunnelvision”

Loke a sosodé ta hopi tristu. A konsentrá riba e aspektonan negativo di e diskurso - ku ta tei sigur - sin akseptá ku e puntonan negativo tabat’ei pa sirbi e resultado final. Asina por a pasa ku e transmishon di TeleCuraçao a presentá solamente e partinan negativo den e charla di Dekker i asina a duna un imágen kompletamente robes di e diskurso den su totalidat. Pakiko no a aksentuá ku Alec Sanguinetti, presidente hopi respetá internashonalmente di CTO, a karakterisá  e charla  komo “briante”? Pakiko hende djafó mesora a komprendé e mensahe y lokalmente a pone énfasis riba kosnan negativo so?

Loke TeleCuraçao a hasi nos ta yama manipulashon i dañamentu di nòmber di un hende ku tin kurashi di papia bèrdat. En bes di ta orguyoso di e vishon, dedikashon i atenshon ku Dekker komo hende y komo invershonista a mustra Kòrsou, nos ke deshasí di dje. E tin ku bai! Pakiko? Kiko nos ta logra ku esei? Dikon no ta bai sinta na mesa kuné? Dikon no ta papia huntu ku un mediador? Dikon nos no ta uni forsa y krea algu bon, manera e konferensha a krea kos bon den sírkulonan profeshonal. Dekker a indiká ku e ta indulgente. Un rekonsiliashon! Pakiko nos no ta tuma e oportunidat aki?

Pero no, sin tuma tempu pa pensa ta proklamá “medida”.  E representantenan for di Caribe ku tabata presente ta na altura di loke ta pasando. Si un karta, for di kua ta sali na kla ku na Kòrsou nos no ta akseptá krítika, resultá den notulen di e organisashonnan aki,  nan no por hasi otro ku investigá, analisá, i konkluí. E resultado di e konklushon lo no sali di bon pa e klima di invershon, esei ta sigur!

Riba nos dushi Kòrsou tur hende sa di Jacob Gelt Dekker. Su manera di opiná ta fundá i semper al kaso, pues hopi biaha konfrontando. Dekker no tin e problema di manteka riba su kabes o “tunnelvision”. Nos sa kon e ta, ku su malu pero sigur tambe ku su bon. E por ta un embahador ekselente pa Kòrsou.

Laga nos pone énfasis na lokual el a hasi bon pa nos isla. Dos hotèl, un museo, sentro di konferensha, un greenhouse i e sentro di diálisis, ta testigunan visibel ku ningun hende por ninga. Jacob a krea kupo di trabou pa hopi di nos hendenan. Ménos visibel pero sigur no ménos efektivo ta e tantísimo publisidat positivo rònt di su persona ku a promové e klima di invershon y turismo. Laga nos ban traha huntu kuné en bes di keda bira den e spiral negativo o pió ainda, hoga den duele pa nos mes dor di kosnan ku nos ta hasi pa laga negativismo triunfá.

Ken lo ke purba di uni e partidonan konserní? E website www.jacobgeltdekker.com por ta e promé plataforma. Na TeleCuraçao nos ta hasi e petishon pa mustra e mesun kurashi ku Dekker, i transmití e charla den su totalidat. Asina tur hende por husga pa nan mes ku e efekto final di e charla tabata positivo. Por ta asina nos por logra di kibra e spiral negativo. Riba nos isla progreso ta stanka ku muchu regularidat. Den e kaso aki no dor di palabranan di Jacob Dekker, pero dor di reakshon ku no ta bon fundá.

Un grupo di habitantenan di Kòrsou, ku ta pensa positivo.